Efnisheimurinn/Gosbrunnur með ammóníaki

Úr skýringum við myndband: "Þessi tilraun er byggð á leysni ammóníaks í vatni. Til að byrja með er ammóníaki safnað í flösku með því einfaldlega að hvolfa tómri flösku yfir aðra flösku með ammóníaklausn. Þá streyma ammóníaksameindir (${\ce {NH3}}$) upp í efri flöskuna. Meðan þetta gerist er útbúin vatnslausn með BTB-litvísi. Vatnið er gert súrt með saltsýru (${\ce {HCl}}$) og verður þá gult enda er BTB gult í súru vatni en blátt í basísku vatni. Nú er tappa með glerröri komið fyrir í flöskunni sem geymir ammóníaksameindirnar og hún látin síga ofan í súra BTB-vatnið. Stuttu seinna fer vatnið að sprautast upp í flöskuna með ammóníaksameindunum. Skýringin á þessu er eftirfarandi: Ammóníakgas (${\ce {NH3}}$) leysist mjög vel í vatni. Þegar flaskan með ammóníaksameindum kemst í tengsl við súra BTB-vatnið fara ammóníaksameindir að streyma niður gegnum glerrörið og inn í súra BTB-vatnið. Við þetta fækkar ammóníaksameindum í flöskunni fyrir ofan vatnið. Þetta hefur þær afleiðingar að þrýstingurinn í flöskunni fellur og vatnið spýtist upp á við uns þrýstingurinn inni í flöskunni er í jafnvægi við loftþrýstinginn fyrir utan hana."